Владата на Србија утре на седница ќе донесе нова уредба за ограничување на цената на нафтените деривати, која ќе биде идентична со постојната и ќе важи до 30 април, изјави за Танјуг министерката за трговија Татјана Матиќ, пренесуваат српските медиуми.

Уредбата за ограничување на максималните малопродажни цени на одредени деривати (дизел и бензин 95) на 30 дена истекува на 11 април.

Матиќ додаде дека текстот на новата уредба е веќе усогласен со министерствата за енергетика, финансии и економија и е подготвен за усвојување од Владата.

Министерот за трговија во овој момент не можеше да каже како владата ќе постапи по тоа прашање по 30 април.

„Многу е неблагодарно да се прејудицира што било во однос на цените на дериватите, бидејќи гледаме дека цените на суровата нафта на светскиот пазар осцилираат. Деновиве забележавме голем пад на цената на нафтата. Се надеваме дека цените на дериватите ќе се стабилизираат и можам да кажам дека со тоа сме умерени оптимисти“, изјави Матиќ за Танјуг.

Според сегашната регулатива, највисоката малопродажна цена со данок на додадена вредност за еуродизелот и безоловниот бензин БМБ 95 е утврдена во висина на просечната големопродажна цена на дериватите на територијата на Србија зголемена за шест динари.

Цените се одредуваат врз основа на механизмот воспоставен со Уредбата на Владата на Србија за ограничување на цената на нафтените деривати.

Според Уредбата, цените на овие два деривати се усогласуваат секој петок и се објавуваат на веб-страницата на Министерството за трговија во 15 часот и важат седум дена.

Највисоките малопродажни цени на овие деривати Министерството за трговија ги утврдува секој петок и ги објавува на официјалната веб-страница најдоцна до 15 часот.

Просечните големопродажни цени на овие деривати ги пресметува Министерството за рударство и енергетика, секој петок до истекот на уредбата и ги доставува до Министерството за трговија најдоцна до 13 часот.

Министерот надлежен за работите од областа на енергетиката поблиску го пропишува начинот на пресметување на просечната големопродажна цена на нафтените деривати на Еуродизел и Еуропремиум БМБ 95.

Регулативата не се однесува на адитивните нафтени деривати.