Повеќе од една година беше потребна за нова средба на највисоките делегации на Србија и Косово во Брисел.

Четвртата официјална средба меѓу српскиот претседател Александар Вучиќ и косовскиот премиер Аљбин Курти започнува во четврток на 18 август во 10:30 часот, со одвоени средби на делегациите со комесарот за проширување на Европската унија (ЕУ) Јосеп Борел и специјалниот претставник на ЕУ за преговори Мирослав Лајчак.

Потоа треба да следи трипартитна средба на која директно би разговарале двете делегации.

По разговорите се очекува да се обратат Александар Вучиќ и Аљбин Курти пред новинарите, а европските преговарачи најавија неофицијален брифинг за медиумите, но и официјално соопштение за јавноста.

Сепак, европските посредници не ги потврдија конкретните теми на разговорите, додека Белград и Приштина наведоа различни приоритети во разговорите - од актуелни проблеми и тензии, спроведување на претходно постигнатите договори, работа на сеопфатен договор, до прашањето за исчезнатите лица.

На преговарачката рунда и претходеа засилени тензии кога Владата на Косово донесе одлука од 1 август да престане да ги признава регистарските таблички за косовските градови издадени од Србија, како и да воведе реципроцитет во издавањето документи за влез и излез за сите оние кои поседуваат српски документи и влегуваат во Косово.

Србите во северно Косово одговорија со подигнување барикади и блокирање патишта.

Тензиите беа смирени кога Владата на Косово по средбата со американскиот амбасадор во Приштина одлучи да ја одложи примената на мерките до 1 септември.

Тоа беше само последен во серијата вакви инциденти во Косово.

Преговори на ден пред преговорите

Делегациите на Србија и Косово пристигнаа во центарот на европските институции еден ден пред официјалната рунда преговори.

Првите средби ги имаа со генералниот секретар на НАТО, Јенс Столтенберг, со кого одвоено разговараа српскиот претседател, а потоа и косовскиот премиер.

Столтенберг им порача на двете страни „да покажат воздржаност и да избегнуваат насилство“, но ги потсети и дека на теренот има околу четири илјади војници на КФОР, воената мисија на НАТО одговорна за одржување на стабилноста на Косово.

Генералниот секретар на Алијансата ги поддржа двете страни во нивните напори за изнаоѓање решение за косовското прашање преку дијалог.

Вучиќ и Курти во средата попладнето беа посетени на одделни локации од двајца меѓународни посредници - Европеецот Мирослав Лајчак и Американецот Габриел Ескобар.

Лајчак и Ескобар одржаа подготвителни средби кои беа последна увертира пред четврток, денот на преговорите.

Но, освен најавата на Твитер дека имало средби, не се познати темите на разговор.

Лајчак и Ескобар се сретнаа без присуство на делегациите од Белград и Приштина.

Европскиот посредник се заблагодари на силната поддршка на САД и на „вонредната соработка“ што ја имаше со американскиот заменик државен секретар Габриел Ескобар во процесот на дијалог.

ФОТО: Твитер