Рокот за пријавување на спорни гласачи тече. Лицата кои се најдоа на листата „фантмски“ гласачи имаат уште три дена да се пријават во ДИК и да го докажат својот идентитет со што ќе можат да го остварат своето право на глас на следните избори.

Според официјалните податоци на ДИК до денес до 09 часот од вкупно 39502 лица, се пријавиле само 5401.

Од нив 5176 лица докажале идентитет, додека Комисијата обработува 70 случаи во моментов, а во фаза на разгледување се 155 пријавени барања.

Имајќи ги предвид фактот дека бројката од близу 40 илјади спорни гласачи не е мала, одѕивот на „фантоми“ е мал.

Луѓето со податоци кои не се совпаѓаат со оние во избирачкиот список треба да се пријават до 19-ти август. Спорните гласачи коишто ќе го пропуштат рокот, ќе имаат и втора шанса за време на јавниот увид во избирачкиот список,  пред одржувањето на изборите.

„ДИК да го повлече списокот на спорни гласачи“!

Колку граѓаните кои се најдоа на списокот со спорни записи се реално спорни, а колку резултат на некомпатибилни основи за вкрстување на податоците е прашање кое деновиве го отворија незадоволните граѓани и  невладиниот сектор. Бројката на оние кои преку канцелариите на ДИК или по електронски пат го докажале своето гласачко право е мала, но големо е незадовоството и револтот кај многумина кои со години живеат на иста адреса и нивното име фигурира во сите бази на податоци. Моделот на прочистување на списокот што го договорија партиите засега не ветува дека ќе се врати довербата во него, туку е обид да  се дефокусира вниманието од вистинските фиктивни гласачи, вели за Фактор, Орхан Муртезани, претседател на Центарот за Демократија и Развој. Според него сеуште е нејасно по која методологија и врз кои критериуми ДИК  го состави овој список на спорни гласачи, па оттука бришењето на гласачите ќе значи лишување од уставно загарантираното право на глас.“Иако првичниот став беше дека станува збор за граѓани кои живеат и работат во странство, секој ден има стотина случаи кога револтирани граѓани изразуваат незадоволство дека се опфатени во овој список, иако никогаш не живееле во странство. Ако го додaдеме  и фактот дека за пријавување на скоро 40 000 гласачи дадени се само дваесетина дена за да се пријават, фактот дека се наоѓаме во период на годишни одмори со што дополнително се усложнува работата, плус фактот дека на списокот се најдени комплетни фамилии на раководни лица од поновите албански опозициски партии, ние сме уверени дека станува збор за обид за лишување на правото на глас”- вели Муртезани.