Во Струмица беше одржана трибина за моментната состојба со градинарското производство и откупот на земјоделските производи.

На оваа трибина учествуваа министерот за земјоделство, шумарство и водостопанство, Љупчо Николовски, директорот на Агенцијата за финансиска поддршка во земјоделството и руралниот развој, Николче Бабовски, и директорот на Државниот инспекторат за земјоделство, Јане Станкоски. Седнати на заедничка маса со земјоделците, откупувачите разговараа за претстојната откупна сезона, но и за сите отворени прашања од овој сектор.

 Министерот Љупчо Николовски  најави дека во наредниот период  приоритет за министерството ќе бидат  отворање на нов откупно-дистрибутивен центар во Струмица и наоѓање нови пазари за пласман на земјоделските и градинарските производи од овој регион. Трибина  во Струмица според него е само продолжување  ваквите средби кои ги одржуваат низ клучните земјоделски региони во државата и во пресрет на откупната сезона.

„Ние ги презентираме политиките на владата кои се усвоени со документи, со програми,  со уредби, со стратегии и сметаме дека треба да ги споделиме и со земјоделците и со откупувачите и со извозниците. Целокупната наша работа да биде најотворена, јавна и транспарентна , но и да ги добиеме сугестиите, коментарите, забелешките од сите нив. Токму затоа сметам дека овој модел на средби заедно со подрачните единиците, со агенцијата за финансиска поддршка на земјоделството, инспекторатот за земјоделство е многу битен“, рече министерот Љупчо Николовски.

Меѓу другото Николовски ги информираше струмичките земјоделци и за договорот кој беше постигнат пред неколку дена со Србија а се однесува на увозот на брашно. Тој потенцираше дека за 95% од брашното кое се увезува од таму  ќе важи новиот правилник и измените кои беа направени, а тоа значи дека маркичките ќе се лепат во Макдонија, а ќе се добиваат по направената  анализа од агенцијата за храна и ветеринарство. За пакувањата до 5 килограни кои изнесуваат само пет проценти од вкупниот увоз на брашно контролните маркички ќе се лепат во Србија.

Николовски посочи дека интензивно се работи и на отворањето нови пазари и дека се создадени нови контакти и можности за пласман и извоз на македонските земјоделски производи.

„Има резултат посетата на премиерот на владата на Република Турција, каде што се разговараше конкретно за извозот на нашето јагне. Со египетскиот министер за земјоделство, и покрај високите царини, се договоривме на наше писмено барање да понудиме што ќе извеземе и царините да бидат сведени на минимум. Очекуваме една голема делегација од Катар, особено во делот на земјоделството, со која ќе разговараме за извоз и пласман на нашите производите“, посочи Николовски.