Советот за надворешни работи на Европската Унија денеска во Брисел ќе одржи состанок на кој ќе се разговара и за европската перспектива на земјите од Западен Балкан.

Во рамки на состанокот, министрите за надворешни работи на земјите членки на ЕУ ќе имаат и работен појадок со шефовите на дипломатиите од регионот. Во фокусот ќе бидат реформските процеси, проширувањето, усогласувањето со заедничката надворешна и безбедносна политика на Унијата, како и хибридните закани со кои се соочуваат земјите од Западен Балкан.

Високата претставничка на ЕУ за надворешна политика и безбедност, Каја Калас, пред почетокот на состанокот изјави дека Брисел сака да разговара за тоа како земјите од регионот да продолжат со реформите и како да се зајакне соработката во справувањето со хибридните влијанија.

Според Калас, искуствата што ЕУ ги има со Молдавија, а сега и со Ерменија, можат да бидат корисни и за Западен Балкан, бидејќи државите од регионот, како што рече, и самите препознаваат притисоци и напади врз демократските процеси.

Таа посочи дека безбедноста и одбраната исто така ќе бидат дел од разговорите. Од земјите кандидати и потенцијални кандидати, според Калас, се очекува поголемо усогласување со надворешната и безбедносната политика на ЕУ, заедно со продолжување на реформите што се дел од европскиот пат.

На работниот појадок се очекува да присуствуваат министрите за надворешни работи на Албанија, Босна и Херцеговина, Црна Гора, Косово, Северна Македонија и Србија.