Црногорецот Милош Мартиновиќ, кој во масакрот во градот Цетиње ги загуби двата малолетни сина и сопругата, четири дена по трагедијата морал да влезе во станот за да ги земе семејните работи. 

Како што пренесува црногорска „Побједа“, при влегувањето во изнајмениот стан, кој се наоѓа во куќата на убиецот Вук  Бориловиќ, каде што живеел со семејството до масакрот, Мартиновиќ нашол крв на подот и покуќнината, додека на фотелјата го пречекале парчиња месо откорнати од куршуми.

Тој во кујната пронашол неискористени патрони за ловечка муниција, под креветот нашол футрола за ловечка пушка и мобилни телефони кои ги користеле неговото семејство. 

Неискористената муниција Мартиновиќ ја однел со себе во семејната куќа каде што сега живее. Мартиновиќ за пронајдените докази го известил еден од командирите на полициската станица во Цетиње, а на полицијата и предал девет парчиња неискористена муниција, пишува црногорскиот весник.

Како што понатаму се наведува во текстот, Мартиновиќ истиот ден испратил известување по електронска пошта за она што се случува со началникот на Секторот за обезбедување Цетиње, директорот на Управата на полицијата и министерот за внатрешни работи.

„На 16.08.2022 година околу 13.30 часот отидов во Медовина бб, куќата во која се случило злосторството, за да земам лични работи. Во таа прилика, покрај личните предмети, најдов и неупотребена муниција за пушка (чаури) во кујната.Очигледно заклучувам дека истрагата не е направена и не се почитувани законските процедури', напишал Мартиновиќ.

Тој истакнува дека повторно преживеал тешки моменти и изразува отворен сомнеж дали полицијата воопшто сакала да го расветли злосторството што се случи на 12 август во Цетиње.

„Се чувствувам повредено од таквиот неодговорен однос кон жртвите на ова монструозно злосторство, пред се членовите на моето семејство. Во неверување дека и покрај сета мака морам да собирам неиспукана муниција и други траги од злосторството околу куќата, губам надеж дека полицијата воопшто сака да го расветли ова злосторство“, се наведува во писмото што го објави црногорскиот портал.

Вук Бориловиќ (34) изврши страшен масакр во Цетиње каде уби десет и рани шест лица, а продолжението на трагедијата го спречија куршумите на полицијата и локален жител.