Левичарското движење ,,Солидарност" бара да се создаде нов изборен модел бидејќи како што вели, досегашниот систем ги фаворизира големите партии и ја продолжува ,,погубната политика" на Македонија „Следните месеци ќе бидат пресудни за нивната изградба, а таа изградба мора да биде транспарентна, вклучувачка и легитимна, а не предмeт на пазарања на ВМРО–ДПМНЕ, СДСМ, ДУИ и ДПА! Праксата на договарање решенија зад затворени врати во изминативе години се покажа како поразителна за демократијата, штетна за стабилноста и несоодветна за интересите на мнозинството граѓан(к)и. Единствени кои профитираат од ваквата пракса се четирите големи партии и нивните лидерства. Во овој период, алармирани од можноста повторно да се организираат избори кои само ќе ја продолжат погубната политика и ќе го зацементираат хибридниот режим, тим на „Солидарност“ во соработка со надворешни експерти работи на изготвување детална студија со конкретни барања и предлози за промена на моделот во интерес на големиот број непретставени граѓан(к)и. Ние на овој процес гледаме со посебна сериозност, затоа што од него директно зависи (ре)демократизацијата на Македонија."- се вели во соопштението. Левичарското движење вели дека овој избирачки систем е наклонет кон големите политчки партии, со што малите политички партии најчесто завршуваат претопени во коалиција, како единствен начин да имаат свои претставници во Собранието. ,,Ова е погубно за плуралитетот на мислења, како и за претставеноста на гласот и интересите на голем дел од граѓан(к)ите кои не се поддржувачи на една од големите партии. Монополизацијата на политичкиот простор од големите партии придонесува кон негувањето на политички клиентелизам и целосната партизација на институциите и општеството." - стои во соопштението. Левичарското движење апелира дека е неопходно и ослободување на јавниот сервис, за да се обезбеди простор за задолжителни ТВ дебати со претставниците на сите партии и граѓански листи.