Претседателот на Собранието Трајко Вељаноски за в среда ја закажа 87 седница на Парламентот, со единствена точка на дневен ред- Иницијативата на ДУИ за распуштање на овој собраниски состав и распишување предвремени парламентарни избори. Оваа иницијатива ДУИ ја поднесе во саботата, а како причина ги наведе блокираните евроатлантски интеграции, но и одлуката на нивниот досегашен коалициски партнер ВМРО-ДПМНЕ да не ја поддржи нивната иницијатива за консензуален кандидат на претседателските избори. Премиерот и лидер на ВМРО-ДПМНЕ Никола Груевски возврати дека „ја прифаќа фрлената ракавица“ и оти неговата партија исто така ќе го поддржи распуштањето на Собранието. Според најавите, предвремените парламентарни избори би се одржале на 27 април, заедно со вториот круг од претседателските избори.