Во буџетот што Фондот за здравство го издвојува за дефицитарни здравствени услуги, годинава за првпат се предвидени пари и за 20 трансплантации на бубрег од починат донатор. Со ова се исполнува и последниот услов за старт на кадаверична трансплантација во Македонија, а на Клиниката за нефрологија веќе се составува листа на чекање на првите пациенти. Буџетот годинава изнесува околу 9,6 милиони евра, а со овие пари ќе се финансираат и трансплантации на црн дроб, кардиохируршки интервенции за 65 деца на Детска клиника,  како и нови терапии на Клиниките за пулмологија, кардиологија и психијатрија. За првпат ќе се  воведе  и реконструкција на дојка по мастектомија, предвидена за четириесетина пациентки. Со овогодинешната делба на буџетот на клиниките, се предвидени пари и за 4500-тини интервенции со фако-методата за катаракта.