Со пари од ЕУ нов лик добија осум железнички станици во Македонија. 

Проектот за реконструкција на 10 железнички станици  е во завршна фаза. Досега е завршена целосната санација на објектите во Велес, Неготино, Демир Капија, Чашка, Табановце, Градско, Богомила и Прилеп, потврди министерот за транспорт и врски, Владо Мисајловски. 

Реновирани се билетарите, чекалните, санитарните јазли, покривите и фасадите на железничките станици. Со инвестицијата беше променета водоводната и електричната инсталација, при што беа инсталирани и нови системи за греење и ладење, системи за сигнализација и информирање на патниците.

„Реконструкцијата на станицата во Битола е во завршна фаза, а пред извесно време започнавме со реконструкција и на последната станица во Гевгелија во рамките на овој проект“- напиша Мисајловски на својот профил на „Фејсбук“. 

Со изградените рампи станиците се достапни и за лицата со инвалидитет. 

Инвестирани се 2,3 милиони евра од Европската комисија и од ИПА фондовите на Европската унија за реновирање на станиците.