Смени има во Министерството за внатрешни работи.

Министерот за внатрешни работи, Митко Чаков поднесе оставка, а Оливер Андонов е предлог за нов министер за внатрешни работи, потврдил за МИА владиниот портпарол Александар Ѓорѓиев.

„Премиерот Димитриев ја прифати оставката на Чавков и согласно законските прописи ја испрати до Собранието заради нејзино констатирање. Истовремено премиерот до Собранието испрати предлог професорот Оливер Андонов да биде нов министер за внатрешни работи. Тој има долгогодишно искуство со работа во разни сфери во областа на безбедноста, а моментално е професор, и тој е предлог кој доаѓа од редот на експертската фела. Откога пратениците ќе го изберат Андонов тој ќе биде нов министер, а потоа ќе биде и дополнителен заменик министер за внатрешни работи во Владата за спроведување на изборите која би требало да се изгласа во Собранието утре“ - вели  Ѓорѓиев.

Според него, се очекува премиерот Димитриев да го предложи Митко Чавков за нов директор на Бирото за јавна безбедност во МВР.

„Откога ќе биде констатирана неговата оставка во Собранието, Чавков ќе биде предложен за нов директор на БЈБ на владина седница која би требало да се одржи во текот на денот“ - додава Ѓорѓиев.

Тој потврди и дека претпладнето Владата имала седница на која по нивно лично барање се разрешени досегашните директори на Бирото за јавна безбедност и на Управата за безбедност и контраразузнавање, Горанче Савовски и Љупчо Андоновски. Од Владата се благодарни за нивниот досегашен ангажман и истакнуваат дека тие како квалитетни кадри и професионалци ќе продолжат да работат во МВР на други позиции. За нов директор на УБК е именуван Владимир Атанасовски, досегашен директор на Управата за финансиско разузнавање.

Собранието во текот на денот треба да одржи седница на која ќе биде констатирана оставката на Чавков и на која ќе се гласа за предлогот за избор на Андонов за нов министер за внатрешни работи.