Маж исчезнал пред 17 години, бил прогласен за мртов, а го пронашле жив во Пирин.

Мажот, по потекло од Русе, го нашле службеници на Националниот парк „Пирин“, кои при редовна контрола забележале импровизирано најлонско засолниште во пределот Чалин Валог, над Банско. На тоа место кампувањето е забрането, па парковата служба пристапила за проверка. 

Кога службениците побарале лични документи, мажот реагирал агресивно и одбил соработка. Била повикана полиција, а по приведувањето во полициска станица e утврдено дека човекот нема лична карта и дека во официјалните евиденции е заведен како исчезнат уште од 2008 година. Подоцна, бидејќи потрагата не дала резултат, за него бил издаден и смртен акт во 2013 година.

Така, по повеќе од една деценија во која семејството и институциите го сметале за мртов, мажот бил пронајден жив во планината.

Директорот на Националниот парк „Пирин“, Росен Баненски, за бугарските медиуми изјавил дека човекот живеел како отпадник и дека според околностите најверојатно не сакал да биде пронајден. Засолништето било поставено подалеку од туристичките патеки и од куќите за гости, на место доволно скриено за да не биде лесно забележано од минувачи.

Дополнителна мистерија внесува и тоа што, според бугарските медиуми, мажот не побарал да биде сместен во социјална установа и одбил помош. Обвинителството најавило процедура за поништување на неговиот смртен акт, бидејќи формално тој мора повторно да биде вратен во правниот систем како живо лице за да може да добие лични документи и да се преземат евентуални мерки за заштита или административна постапка.

Според дел од објавените информации, мажот пред властите раскажал дека по исчезнувањето ја напуштил Бугарија преку таканаречена зелена граница и извесен период живеел во Грција, каде што се грижел за животни на фарма во пограничен регион. Засега нема целосни официјални детали за тоа каде бил сите овие години, како преживувал и зошто никогаш не стапил во контакт со семејството.

Случајот отвори и правна дилема. Човек што со години не постоел во евиденциите како жив граѓанин, сега треба повторно да добие идентитет пред институциите. До тогаш, секоја постапка кон него, од издавање лична карта до евентуална казна за нелегално кампување, зависи од тоа како ќе биде поништен смртниот акт.

foto Wikipedia/Dido3