Вицепремиерот за економски прашања Владимир Пешевски на денешната седница за пратенички прашања изјави дека е предвидена изградба на систем за производство на вештачки снег, кој ќе се користи за заснежување на скијачките патеки на Пелистер, како и реновирање на хотелот „Молика“. „Изградбата на системот предвидува да биде реализирана со инвестиција во износ од околу милион евра. Рокот за реализација почнува годинава, а завршува 2017 година. Во тек е тендерска постапка за изработка на проект за изградба на отворени базени на вода потребни за производство на ветачкиот снег по што ќе следи изградбата и набавката на целокупната опрема потребна за производство на снегот“, вели вицепремиерот Пешевски. Освен изградба на овој систем и реновирање на хотелот, предвидено е и да се воведат различни содржини за гостите, како што се спа центар и катче за најмладите. Оваа инвестиција чини околу 3 милиони евра, а треба да биде целосно реализирана до крајот на 2017 година.   Љ.Н.