Синдикатот на државната управа реагира против одлуката на Владата која на вчерашната седница времено го суспендира флексибилно работно време за сите вработени во администрацијата и наместо сегашното работно време од 07:30 до 15:30 и од 08:30 до 16:30, од први октомври за сите ќе важи работното време од 08:00 до 16:00 часот.

УПОЗ тврди дека не бил претходно информиран и консултиран како социјален партнер. Од таму тврдат дека во Гранскиот колективен договор потпишан во почетокот на оваа година стои дека работното време е флексибилно.

„Ваквата одлука, за Синдикатот на УПОЗ е нејасна и конфузна и веднаш создаде револт меѓу вработените од причина што Владата со носењето на ваквата одлука сметаме дека не го почитува социјалниот дијалог, постапува спротивно на Конвенциите на Меѓународната организација на трудот и го негира Гранскиот Колективен договор за органите на државната управа“, соопшти УПОЗ.

Синдикатот тврди дека одлуката не може да биде донесена еднострано и се надева дека Владата ќе ја преиспита одлуката.