Пратеничката Силвана Бонева која е мета на социјалните медиуми по информацијата на Инбокс 7 дека земала 23 000 евра на име патни трошоци за само една година, во изјава за утрешен „Слободен печат“  вели дека зела толку колку што и следувало и се брани дека медиумите се тенденциозни кон неа и дека и пратеници од СДСМ земале за патни трошоци. Таков надоместок, пишува пратеничката од Струмица Бонева на нејзиниот фб профил, за амортизација и гориво се пресметува на сите вработени во администрацијата и функционерите скоро 25 години во Р М. – Со лага ага не се бидува. Не е точно дека сум зела месечно 5 илјади евра, дека сум пријавила дека сум поминала 660 илјади километри годишно и не е точно дека наведената сума се однесува за 11 месеци од 2014 г. Износот што ми е исплатен е за две години, за 2013 и 2014 .Надоместокот е за гориво и амортизација и согласно законот истиот го зеле сите пратеници од партиите на опозицијата и мнозинството, а не само еден пратеник – пишува таа на фејсбук.

Во јавноста и на социјалните мрежи се крена многу врева откако интернет порталот Инбокс 7 објави истражување според кое за 11 месеци,  за патни трошоци на пратениците им биле  исплатени близу 1 милион евра.

Според податоците на порталот во првите 11 месеци од минатата година за патни трошоци на пратениците  им била исплатена сума од  60.302.260 денари што е околу 1 милион евра. При тоа од порталот наведуваат дека трошоците  се направени во периодот од мај 2013 година до септември 2014.

Најмногу пари за патни трошоци добил пратеникот од Гевгелија, Драги Цуклев. Тој наплатил близу 25 илјади евра.

Битолските пратеници Зоран Илиовски и Љиљана Кузмановска, наплатиле по 6000, односно 18.000 евра.

На сметката на Силвана Бонева, Собранието до ноември 2014 година исплатило нешто помалку од 23.000 евра.

Роза Топузовска Каревска наплатила 4.500 евра, а нејзината сограѓанка од власта Ане Лашкоска, во првите 11 месеци лани наплатила околу 17.000 евра за патни трошоци.

На координаторот на пратеничката група на ВМРО-ДПМНЕ, Илија Димовски во 2014 година на Димовски му се исплатени 5.200 евра.

За патни и дневни трошоци за пратеници и службите, Собранието на располагање годинава има дополнителни 813 илјади евра.