Европската економија се соочува со сериозни ризици доколку енергетската криза продолжи, предупредува Европската централна банка, која го разгледува најлошото сценарио за еврозоната.

Според најновите податоци, годишната инфлација во еврозоната во март се искачила на 2,6 проценти, во однос на 1,9 проценти во февруари. Но, според проценките на ЕЦБ, доколку проблемите со снабдувањето со енергенси продолжат до 2027 година, инфлацијата би можела да достигне дури 4,4 проценти.

Во меѓувреме, расположението на потрошувачите во Европската Унија значително се влошува. Индексот на доверба во еврозоната во април паднал на минус 20,6 поени, што е најниско ниво од периодот 2022–2023 година, покажуваат податоците на Европската комисија.

Причина за ваквиот тренд е наглото поскапување на енергенсите, како последица на конфликтот на Блискиот Исток и нарушувањата во снабдувањето преку Ормуската Теснина, преку која минува значителен дел од светските испораки на нафта и гас.

Во март, цените на енергијата во ЕУ пораснале за повеќе од 5 проценти на годишно ниво, што дополнително ги зголемува инфлаторните притисоци.

ЕЦБ предупредува дека доколку кризата продолжи, ќе се намали довербата кај компаниите и домаќинствата, што може да доведе до пад на потрошувачката и инвестициите.

Целосниот извештај за економските очекувања во ЕУ и еврозоната Европската комисија ќе го објави до крајот на месецот.