Корпоративните работници во Старбакс мора да се вратат во канцеларијата најмалку три дена неделно до крајот на јануари, објави привремениот извршен директор Хауард Шулц во допис до менаџерите..

Вработените кои моментално работат онлајн, а се релативно блиску до седиштето на компанијата, ќе мора да одат во канцеларија во вторник, среда и друг ден што ќе се договорат со раководните лица.

Од друга страна, и вработените во подрачните одделенија треба да доаѓаат на работа три дена во неделата, но во белешката не е наведено за кои денови станува збор, ниту пак „што се смета за растојание до работа“.

Кога американскиот ланец на кафетерии започна со хибридна работа минатата година, корпоративните работници, според Шулц, „дадоа ветување“ дека ќе бидат во канцеларија еден до два дена во неделата.

Сепак, како што изјави за Си-Ен-Ен, врз основа на податоците, излегува дека добар дел од корпоративните работници не го исполнуваат своето ветување ниту околу еден ден поминат во канцеларија.

„Поради оваа причина, објавувам и дека оваа политика...е услов“, напиша шефот на Старбакс, додавајќи дека таа е „клучна за деловниот успех на компанијата“.

Најавата на Старбакс доаѓа неколку дена откако главниот извршен директор на Дизни, Боб Ајгер, им нареди на работниците да се вратат во канцеларијата четири дена во неделата, почнувајќи од 1 март. Тие денови се понеделник, вторник, среда и четврток.

Многу други големи компании, исто така, спроведуваат строги правила за враќање на работа, откако далечинското работење стана повеќе воспоставено за време на пандемијата. Apple, на пример, ги повика своите корпоративни работници да бидат во канцеларија најмалку три дена во неделата, а матичната компанија на Snapchat неодамна побара од работниците да се вратат во канцеларија 80% од времето, што е еквивалентно на четири дена во неделата, почнувајќи од февруари .

Градоначалникот на Њујорк Ерик Адамс во четвртокот изрази жалење за негативното влијание на далечинската работа врз економијата на градот. Стапките на слободни работни места сега се на рекордно високо ниво, бидејќи администрацијата на Адамс укажува на континуирано бавно темпо на враќање на работниците во канцелариите од почетокот на пандемијата во 2020 година.