Демонстрантите од „Шарената револуција“ денеска во 12 часот, ќе го блокираат сообраќајот во Скопје.

Блокади ќе има на три крстосници во центарот на градот и тоа кај Судска палата, кај Црвениот крст и кај Соборниот храм.

„Преку блокирање на улиците ќе покажеме како всушност изгледа со години нашaта земја. Ние живееме во блокирана држава, со блокиран пристап до правда, со блокирани и партизирани институции. Ќе го оневозможиме движењето како што со години оваа власт ја оневозможува еднаквоста пред законот и слободата на граѓаните“- се вели во повикот објавен на Фејсбук.

Демонстрантите апелираат за разбирање и толеранција од скопјани и наместо да се лутат да свирнат за поддршка.

Блокадата е дел од новите акции, кои ќе ги заменат протестите што скоро два месеци во 18 часот почнуваа пред СЈО.

Во понеделникот движењата „Шарена револуција“ и „Протестирам“  побараа до 18 јуни да се исполнат двете клучни барања – Уставниот суд да се произнесе за уставноста на СЈО и да запре прогонот врз демонстрантите.