Здружението на новинари денеска го одржа изборното Собрание на кое членовите од своите редови бираа претседател кој ќе ги води наредните четири години, членови на управниот одбор, на надзорниот одбор и членови на Советот на честа. За челната позиција на Здружението кандидирани беа досегашниот претседател Насер Селмани, новинар во дневниот весник „Вест“, и неговиот колега Семи Мехмети, уредник на порталот „Алмакос“. По изборот со 154 гласови здружението повторно му ја даде довербата на старо – новиот претседател Селмани, додека неговиот противкандидат Мехмети освои 22 глас. На денешното изборно Собрание, беше усвоена и „Декларација за Томислав Кежаровски“, со која се бара негово ослободување од вина. Кежароски во 2013 година беше обвинет за откривање на идентитет на заштитен сведок. „Нашата порака е јасна и недвосмислена, Кежаровски мора да биде слободен сега и веднаш! Бараме од Апелацискиот суд во Скопје, додека сè уште го чекаме неговиот финален збор, да ја донесе единствената одлука со која ќе ја задоволи правдата – да го ослободи од вина“, се вели во Декларацијата што ја усвои ЗНМ.