Претседателот на Србија, Александар Вучиќ, доби покана од претседателот на Народна Република Кина, Си  Џинпинг, да учествува на Самитот на Кина и земјите од Централна и Источна Европа што ќе се одржи преку видео врска на 9 февруари.

„Годината 2020 година беше повеќе од предизвикувачка. Соочени со ненадеен напад на заразната болест ковид-19, Кина и земјите од ЦИЕ ги здружија силите во борбата против вирусот корона и надминување на исклучително тешкиот временски период предизвикан од оваа болест, што создаде нов поттик за соработка меѓу Кина и овие држави“, напишал кинескиот претседател.

Со оглед на ограничувањата наметнати од пандемијата, вели Џинпинг во поканата, се согласивме да го одложиме самитот на Кина и ЦИЕ, кој првично беше закажан за април минатата година и кој требаше да се одржи во Пекинг.

„Како што стојат работите, земјите влегоа во нова фаза на одговор на ковид и се соочуваат со големи предизвици во економското закрепнување и развој. Потребно е Кина и ЦИЕ да ја зајакнат комуникацијата, да постигнат консензус и да го нацртаат текот на идната соработка за поддршка на економското и социјалното закрепнување и развој во пост-ковидната ера. Имајќи го ова предвид, Кина ќе одржи Самит со ЦИЕ на 9 февруари преку видео врска. Како домаќин, драго ми е да ве поканам да учествувате на овој Самит и со нетрпение очекувам да имам можност да разговарам со вас за начините за постигнување заемно корисна соработка и подобрување на билатералните врски и соработка меѓу Кина и ЦИЕ. Заедно, можеме да дадеме голем придонес во збогатувањето на целокупната соработка меѓу Кина и Европа и унапредувањето на развојот што го споделуваат обете страни. Ве молам, прифатете ги изразите на мојата најдлабока почит“, стои во писмото на претседателот на Народна Република Кина, Си Џинпинг, упатено до претседателот на Србија, Александар Вучиќ.