Се огласи државната ЕСМ околу набавката на гас од бугарската компанија Балкан Јутилитис.

Тврдат дека го избрале понудувачот кој имал испратено пониска цена во моментот на носење на одлуката, а тоа е Балкан Јутилитис, и дека со таа компанија е склучен валиден договор, кој ги содржи сите параметри од јавниот повик, и тоа количина, цена, динамика, но и гаранција за испораката за потребните количини.

„ЕСМ Продажба во декември 2022 година објави повик и спроведе постапка за набавка на природен гас за месец јануари 2023 година за свои потреби, како и за потребите на други стопански субјекти во државата.

Јавниот повик беше достапен за сите домашни и странски компании, додека до сите активни лиценцирани трговци и снабдувачи во Р. Северна Македонија беше испратена и директна покана за поднесување понуда.

На повикот беа добиени две понуди за испорака на природен гас, од Макпетрол со цена од 116,20 e/MWh и од Балкан Јутилитис со цена од 115,97 е/MWh.

На денот на носење на одлуката за избор, цената на природниот гас на берзата изнесуваше 137 e/MWh.

Со понудувачот кој имаше понудено пониска цена во моментот на носење на одлуката за избор, склучен е валиден деловен договор кој ги содржи сите параметри од јавниот повик, односно количина, цена, динамика и гаранција за испорака“, се вели во соопштението кое го добивме од ЕСМ.

Сепак, Фактор се уште не доби одговор од која банка е гаранцијата што ја издале Балкан Јутилитис, со која би се гарантирало дека компанијата ќе ги испорачува потребните колични и доколку дојде до зголемување на цените на гасот на светските берзи. 

Инаку, од ЕСМ информираат и дека ЕСМ Продажба во текот на јануари ќе спроведе јавен повик за набавка на природен гас за февруари 2023 г, со дефинирани услови.