По повеќегодишното зголемување на бројот на издадени дозволи за странски работници во Хрватска, годинава има намалување на издадените дозволи за странци.  Минатата година бројот на издадените дозволи за странските работници е повеќе од 206.000. Во првите девет месеци од 2025 година има помалку дозволи за странски работници и доколку продолжи до крајот на годината, бројот на дозволи би можел да се намали под 180.000. Според најновите податоци од Министерството за внатрешни работи, на крајот на септември се издадени помалку од 136,200, што е за 22,600 или 14,3 проценти помалку отколку во истиот период минатата година.

Со зголемувањето на платите, одредени работни места во Хрватска стануваат поинтересни за домашните работници, а се зголемува и бројот на пензионери кои одлучуваат да работат со скратено работно време.

Според најновите податоци од Хрватскиот институт за пензиско осигурување, во средината на оваа година повеќе од 37,500 постари лица работеле со пензија, што е за 17 проценти (или околу 5,500) повеќе отколку во истиот месец минатата година.

Од петте индустрии кои најмногу се потпираат на увоз на работна сила и на кои се однесуваат речиси 90 проценти од издадените дозволи за работа и престој, раст е забележан само во трговијата. Оваа година зголемување на работници од надвор е забележано само кај Филипинците кои често се вработени токму во трговскиот сектор.