Министерот Чавков потврди дека МВР врши проценка на ризикот по безбедноста на актуелни, но и поранешни функционери врз кои има реални закани. Медиумите пренесуваат дека на државен трошок се „чуваат“ екс министерката Јанкуловска која има 6 член тим со 3 возила, додека пак за безбедноста на Сашо Мијалков, екс директорот на УБК, се грижат осумина припадници на службите на МВР со четири возила. Чавков не сакаше конкретно да посочи кои политичари се штитат, но посочи дека и екс министерот Спасовски кој беше од редовите на СДСМ се уште е обезбедуван иако му завршил мандатот. Ниту пак ги откри заканите кон функционерите и од кого се упатувани. Пресудно според новата уредба на владата се конкретни закани по животите на функционерите и тие ќе бидат обезбедувани се додека истите траат, без оглед што мандатот им е истечен по една година. Засега нема одговор кој врши надзор над проценките на заканите и ризиците по животот на функционери и политичари, освен што одлуките ги носи самото министерство, па можеби ќе биде побаран одговор од страна на собраниската комисија за надзор на работата на УБК. Право на редовно обезбедување и по престанок на мандатот имаат поранешните премиери и претседатели на Република Македонија.