Во првите девет месеци од оваа година, произведени се 1.138 гигават часови (Gwh) помалку струја од  планираното, обвини опозицискиот СДСМ. „Планирано било производство на 4.657 гигават часови струја а произведени се само 3.519. Наместо домашна произведена струја зголемен е увозот на електрична енергија за над 700 гигават   часови. Според овој Извештај планиран бил увоз на само 1.569 а увезени се 2.285 гигават часови. За само 9 месеци од оваа година. За овој период над 40% од вкупната струја е увезена а тоа го плаќаат граѓаните и фирмите“, вели Васко Ковачевски од СДСМ, цитирајќи ги податоците од Диспечерскиот извештај на МЕПСО. „Зарем сега државната ЕЛЕМ ќе ја демантира државната МЕПСО? Факт е дека Македонија се помалку произведува, а се повеќе увезува струја. Ако се земе предвид откажувањето на Блок 1 во РЕК Битола, застојот во ХЕЦ Маврово и РЕК Осломеј, до крајот на годината овие податоци ќе бидат уште полоши. За катастрофалните енергетски политики кои ги чинат граѓаните поскапа струја, од зголемен увоз и укината евтина тарифа дел од одговорните лица се во оваа зграда“, додава тој.