СДСМ  презентираше анкетните листови според  кои лидерот на ВМРО-ДПМНЕ, Никола Груевски во текот на 2014 и 2015  година секој месец заштедувал по 10 000 евра.

Со тоа за една година станал пообогат за 118. 629 евра. Најмогу ги зголемил сумите во денари и во евра, така што во 2014 имал 2 162 412  денари, а следната година 8 887  542.

Според портпаролот на СДСМ, Петре Шилегов, потврда дека Груевски не се потпирал на неговата плата  е графата  за основот на стекнување , каде тој или не дал податок или рекол дека ги стекнал на друг начин.

Шилегов смета дека ова е  единствената причина зошто антикорупциската комисија не сакаше да ги даде на увид на јавноста анкетните листови на Груевски.

На ова Груевски одговори дека СДСМ се во очај, и затоа се однесуваат деструктивно. За обвинувањата на Шилегов вели дека се лаги и манипулации.

„Настапот на СДСМ е уште една голема лага, со која партијата се обидува да ги доведе во заблуда граѓаните. Со сета морална и материјална одговорност тврдам дека единствениот приход кој го имам изминативе години е приходот од платата којашто ја добивам. Единствениот начин на кој што заработувам е преку платата која што ја добивав. Не постојат никакви екстра приходи, сомнителни трансакции или приливи какви што сака да измисли СДСМ“ - вели Груевски.

Тој тврди дека целосна лага е тоа дека анкетните листови од 2014 и 2015 година биле сокриени. Рече дека биле доставени до Државната комисија за спречување на корупција и достапни на јавноста.