Комисијата за образование и наука на СДСМ подготви официјална претставка до Меѓународната организација на трудот, во Женева, во врска со прекршувањето на одредбите на Конвенциите 87 и 98 за слободата на здружување и колективно договарање, објави Петар Атанасов, претседател на Комисија за образование и наука и член на ИО на СДСМ. Според него, ова е реакција на преку ноќ донесените измени во законите за основно и средно образование во Собранието на РМ. „Претставката до Меѓународната организација на трудот се однесува на измените во Законите за основно и за средно образование со коишто власта предвиде замена на наставниците кои штрајкуваат со други наставници, што е спротивно на Уставот и законите. СДСМ како левичарска партија и натаму ќе ги поддржува сите барања за унапредување на правата на работниците, условите за работа и статусот на вработените во државниот сектор“, вели Атанасов. Тој нагласува дека СДСМ остро се спротивставува на какви било обиди за изигрување на правото на штрајк на вработените во образованието, како и политички игри и злоупотреби на ова право.