Опозицискиот СДСМ побара власта целосно да го повлече пакетот на закони за зголемување на давачките за хонорарите. - Доколку пратениците на ВМРО-ДПМНЕ навистина сака да ги заштитат невработените граѓани и оние кои со години работат, а не се социјално и здравствено осигурени, ќе предложеа задолжителна трансформација на сите хонорарни договори во договори за редовен работен однос, токму како што тоа наводно ќе го направат за 3.000 вработувања во јавната и државна администрација – рече Мила Царовска од СДСМ. Додека СДСМ се занимава со лаги, манипулации, црни сценарија и се обидува да го руши уставниот поредок, Владата продолжува да носи мерки во интерес на граѓаните, реагираат од ВМРО-ДПМНЕ . - Најновите измени во делот на законот за хонорарци се донесени врз база на консултации со државни институции, доставени забелешки на граѓани и организации кои беа прегледани и имплементирани. Покрај значајните придобивки што ги нудат измените, како обезбедување на пензиски стаж за пензија овозможувајќи мирна и сигурна старост, односно повисок износ на пензија, лицата задолжително се осигуруваат од ризиците на старост, инвалидност, смрт и здравствено осигурување. Овие измени исто така се во насока на зголемена заштита на правата на работниците и нивниот статус, соопштија од владејачката партија.