Воените дејствија на Блискиот Исток и откажувањето на летовите до тој регион веќе влијаат врз туристичките текови во Босна и Херцеговина(БиХ), а туристичкиот сектор предупредува дека последиците би можеле да бидат видливи во текот на целата година.

Претседателот на Туристичката заедница на Сараевскиот кантон, Харис Фазлагиќ, во изјава за Фена изјави дека сите летови што го поврзуваат Сараево со земјите од Заливот се откажани, што директно влијае на пристигнувањата на туристите.

„Секако дека е лошо бидејќи сите летови се откажани. Како што знаете, Сараево има директни летови со Саудиска Арабија, Катар, Абу Даби, Дубаи и Емиратите, па сите тие летови се откажани и секако тоа веќе се чувствува. Ќе ги сумираме нашите резултати на крајот на март, но генерално штом авионите не летаат, никој не доаѓа кај нас, и затоа никој не заминува“, рече Фазлагиќ.

Тој додава дека во текот на месецот Рамазан пристигнувањата на туристи од тие земји  не се во голем број, но дека поголем прилив на гости обично се очекува по Бајрам.

„Туристите од споменатите земји се најдобрите туристи кои го посетуваат Сараево со години. Мислам дека нивното недоаѓање и непојавување ќе имаат силно влијание врз туризмот во Сараево ако она што се случува не се спречи во блиска иднина. Генерално, тоа сигурно ќе има влијание врз овогодинешниот туризам во Сараево и глобално“, истакна тој.

Фазлагиќ наведува дека Туристичката организација веќе работи на пренасочување на промоцијата кон други пазари, првенствено регионот и европските земји.

foto Wikipedia/Yukof