Денеска во Загреб, утре во Славонија, министерот за економија Ваљон Сарачини тргна во лов на инвеститори во Хрватска. Целта на ова роуд шоу е да се сретне со инвеститорите и да ги запознае со можностите и инвестициските проекти во земјава. Денеска оствари средба со министерот за економија Иван Врдољак, а најавени се средби и со министерот за претприемништво Гордан Марас и за туризам, Дарко Лоренчин. Со хрватскиот колега Врдољак разговарале за влезот на Хрватска во Унијата ,а било посочено дека економската и трговската соработка ќе продолжи според Спогодбата за стабилизација и асоцијација што Македонија ја има договорено со ЕУ. „Македонија и Хрватска имаат одлични политички односи, меѓу земјите постои посебно почитување и силно пријателство, но потребно е да работат повеќе за продлабочување на економската соработка", смета Сарачини. Според него, заедничка цел е во наредните пет години Хрватска да биде меѓу првите пет трговски партнери на Република Македонија. Затоа, вели тој, треба да се интензивира соработката меѓу коморите и компаниите. Се разговарало и за енергетиката и конкретните инвестициски проекти, за инфраструктурата, а Хрватите најзаинтересирани биле за секторот на минерални суровини. На презентацијата која Сарачини ја одржа во Хрватска, покрај компаниите присутни во Македонија, имало и нови компании заинтересирани за отварање на нови погони. Хрватска во последните 3 години се наоѓа на 12 место во вкупната трговска разменаа први земји по извозот се Германија, Косово, Србија, Бугарија, Италија и Грција. За министерот Врдољак,  по примерот на „Агрокор“, „Атлантик Груп“, „Виндија“ и други фабрики би можеле да инвестираат во Македонија. Според најавите, до крајот на годината се очекува посета на хрватска делегација во Македонија и потпишување анекс договорот за изменување и дополнување на договорот за економска соработка и трговија. Целта на овој анекс е да се елиминираат сегашните пречки за бизнис меѓу двете држави. Хрватска се наоѓа на 12 место во вкупната трговска размена последните 3 години. Посетата на Сарачини утре се сели во Славонски Броди и Осиек, каде треба да ја посети компанијата „Ѓуро Ѓаковиќ“.