Министерката за енергетика Сања Божиновска информираше дека денес се одбележуваат две години од формирањето на Министерството за енергетика, рударство и минерални суровини, при тоа потсетувајќи дека институцијата е воспоставена од самиот темел.

„Како прва жена која ја извршува функцијата министер за енергетика, рударство и минерални суровини, имав чест и одговорност да помогнам во изградбата на оваа институција од самите темели. Започнавме без воспоставени структури, без преседани и без јасно трасиран пат. Заедно ги поставивме темелите на министерство кое денес има клучна улога во креирањето на политиките во областа на енергетиката, рударството и минералните суровини во Македонија.

Во текот на овие две години изработивме закони и подзаконски акти, ја зајакнавме соработката со меѓународните партнери, одржавме бројни билатерални средби, инициравме значајни проекти и неуморно работевме на унапредување на енергетската безбедност, одржливоста и економскиот развој“, објави Министерката.

Божиновска додава дека институционализацијата е признаена и низ Европа, Соединетите Американски Држави и пошироката меѓународна енергетска заедница.

„Создавањето на Министерството за енергетика, рударство и минерални суровини никогаш не беше само прашање на формирање нова институција. Тоа беше создавање трајна основа за иднината на Македонија, зајакнување на нашата енергетска независност, искористување на потенцијалот на нашите природни ресурси и отворање нови можности за генерациите што доаѓаат“, напиша Божиновска меѓудругото на социјалните мрежи.