Дел од македонските новинари денеска накусо ги објаснуваат своите стојалишта во врска со „случајот Кежаровски“ и можните импликации што тој со себе ги носи.

Сања Васиќ, Телма:

Приведуваето на нашиот колега Кежаровски само 24 часа по објавување на втората срамна пресуда  само затоа што професионално си ја вршеше  работата, е сурова  демонстрација на сила, но истовремено и демонстрација на слабост  заради неговото достоинство  и храброст   пред  најстрашниот предизвик – одземањето на слободата. Тоа е демонстрација на сила и за сите негови колеги кои застанаа во негова одбрана и во одбрана на професијата.

Ова  не е притисок само врз сите нас, како новинари, туку и врз сите  нас како граѓани. Јасно  е дека со невидената  суровост и  безобзирност кон животот и судбината на Кежаровски и неговото семејство се испраќа закана. Се засилува ова насилство кон јавно изговорениот збор, кон новинарството, кон демократијата. Она што можеме да го направиме како новинари е да не молчиме. Селективната правда, корумпираното судство и притисокот на власта од Томче Кежаровски  само создаваат симбол на новинарската слобода.