Самсоненко го презема ФК „Вардар“
По 50 илјади денари за акција и уште 1,5 милиони евра како обврска за инвестирање во наредните 10 години - ова се условите под кои досегашниот сопственик на Ракометниот клуб „Вардар“ Сергеј Самсоненко го купи и Друштвото за спортски дејности „Фудбалски клуб Вардар“ АД Скопје.
Рускиот бизнисмен, за било каква дополнителна продажба на ФК Вардар, претходно ќе мора да добие дозвола од Советот на Град Скопје. Самсоненко бил единствен понудувач за купување на македонскиот фудбалски шампион, кој досега беше во сопственост на Градот Скопје.
„Од 2011 година до сега Град Скопје во ФК Вардар инвестираше 75 милиони денари што резултираше со стабилизирање на клубот и станување на шампион на Првата македонска фудбалска лига две години по ред. Сметаме дека сега е моментот да се отстапи место за нов сопственик кој ќе инвестира во клубот и ќе овозможи излез на ФК Вардар на меѓународната сцена. Договорот за продажба е во завршна фаза и се надевам дека истиот ќе биде потпишан нареднава недела“, рече градоначалникот Коце Трајановски.
Самсоненко најави дека во наредниот период ќе работи на засилување на тимот, а ќе изгради и камп со терени и простории за тимот каде играчите ќе добијат услови за тренирање и подготовки.
„Мојата цел не е еден настап на Вардар во групите на Лигата на шампионите, туку континуирани учества во истата. Гарантирам дека ќе работам чесно и посветено, па заедно ќе се радуваме на идните успеси“, рече Самсоненко и додаде дека во идинина очекува да гледа полни трибини на Филип Втори.
Слично
Поврзани вести
