Во сите центри за јавно здравје низ Македонија од денеска започнуваат да функиционираат бесплатни советувалишта за откажување од пушење. Во нив ќе се одржуваат едукативни предавања за штетноста на пушењето, а е предвидено на пријавените да им помагаат и психолози. Програмата првенствено е наменета за лекарите и здравствените работници кои се пушачи, но подоцна ќе биде отворена и за сите граѓани, најави министерот за здравство Никола Тодоров. „До средината на август, советувалиштата ќе бидат достапни за лекарите. Од 20 август советувалиштата ќе бидат достапни и за сите заинтересирани граѓани кои ќе се обратат во Центрите за јавно здравје, а воедно ќе бидат воведени и посебни термини наменети за советување за откажување од пушење кај адолесцентите“, изјави вчера Тодоров. Во советувалиштата е предвидено да се врши групна, но и индивидуална едукација.