САД потрошија 3,7 милијарди долари за војната со Израел против Иран во првите 100 часа

Според Центарот за стратешки и меѓународни студии со седиште во Вашингтон, се проценува дека првите 100 часа од војната меѓу САД и Израел против Иран чинеле околу 3,7 милијарди долари.

Според Центарот, ова е приближно 891,4 милиони долари дневно, нагласувајќи дека раната фаза од конфликтот е особено скапа бидејќи се потпира на напредна и скапа муниција.

Со оглед на тоа што претседателот Доналд Трамп и министерот за одбрана Пит Хегсет укажуваат дека војната може да трае со недели, извештајот предупредува дека на Пентагон можеби ќе му треба дополнително финансирање надвор од сегашниот буџет.

Конфликтите на Блискиот Исток денес влегоа во седмиот ден. Информациите добиени од Политико велат дека Централната команда на САД планира војната да трае повеќе од 100 дена, дури и до септември.

„Централната команда на Соединетите Американски Држави (CENTCOM) бара од Пентагон да испрати дополнителни офицери за воено разузнавање во своето седиште во Тампа, Флорида, за да ги поддржат операциите против Иран најмалку 100 дена, но веројатно до септември“, објави Политико.

Иранската револуционерна гарда вчера објави дека ќе го затвори Ормутскиот теснец исклучиво за бродови што пловат под знамињата на Израел, САД и европските земји.

Ормутскиот теснец претставува една од најважните енергетски артерии во светот, бидејќи приближно една петтина од глобалните залихи на сурова нафта минуваат низ него. Самото затворање на теснецот, дури и во ограничен обем, би се почувствувало во секој дел од светот, првенствено во областа на енергетиката.