Американскиот министер за финансии Скот Бесант изјави дека САД би можеле да ги укинат санкциите врз Венецуела следната недела за да се олесни продажбата на нафта.

Бесант за Ројтерс изјави дека Вашингтон би можел да го олесни користењето на речиси 5 милијарди долари венецуелски средства замрзнати во специјалните резерви на Меѓународниот монетарен фонд (ММФ) за обнова на економијата на земјата.

Тој рече дека се разгледуваат мерки за олеснување на враќањето на приходите од продажба на нафта , главно складирани на танкери, назад во Венецуела.

„Ги укинуваме санкциите за нафтата што ќе се продава“, рече Бесант, додавајќи дека дополнителните санкции би можеле да бидат укинати веќе следната недела, но не прецизираше кои.

Тој, исто така, најави дека следната недела ќе се сретне со шефовите на ММФ и Светската банка во врска со нивното повторно ангажирање со Венецуела.

Според него, американското Министерство за финансии би било подготвено да ги конвертира специјалните резервни средства на Венецуела во долари за финансирање на реконструкцијата.

Овие потези се дел од напорите на администрацијата на американскиот претседател Доналд Трамп за стабилизирање на Венецуела и поттикнување на враќањето на американските нафтени компании , една недела откако американските сили го уапсија венецуелскиот претседател Николас Мадуро и го префрлија во Њујорк под обвинение за трговија со дрога.

Бесант процени дека помалите приватни компании брзо ќе се вратат во венецуелскиот нафтен сектор, додека, како што рече, компании како „Шеврон“ би можеле дополнително да го зголемат своето присуство во земјата.