Руската државна енергетска компанија „Росзарубежнефт“ денеска објави дека сите нејзини енергетски средства во Венецуела се во целосна сопственост на Русија и дека се купени под пазарни услови, во согласност со венецуелското законодавство, меѓународното право и билатералните договори меѓу двете земји.

Како што е наведено во соопштението доставено до агенцијата ТАСС, компанијата поседува акции во заеднички нафтени и гасни компании со венецуелската државна компанија PDVSA, а купувањето на средствата е реализирано по целосна пазарна вредност, со претходни одобренија од надлежните регулатори во Венецуела.

Росзарубежнефт истакнува дека од 2020 година, поради влошувањето на условите на глобалниот пазар на нафта, сите расположливи пари се насочуваат кон одржување на постојното производство, без исплата на дивиденди.

Компанијата, исто така, соопшти дека има намера да продолжи со спроведувањето на заеднички проекти во Венецуела и да остане посветена на исполнување на сите преземени обврски, во тесна координација со меѓународните партнери.

Во соопштението се наведува дека во текот на 2025 година, Русија и Венецуела дополнително ја зајакнале својата соработка со потпишување на договор за стратешко партнерство, кој вклучува заедничка експлоатација на нови наоѓалишта, подобрување на ефикасноста на производството и намалување на оптоварувањето со животната средина, пренесува Србија Данас. 

foto freepik.com