Кинескиот увоз на сурова нафта од Русија скокна на рекордно ниво во мај, додека Саудиска Арабија го загуби статусот на главен снабдувач на Кина.

Кинеските компании, вклучително и државниот рафинериски гигант Sinopec и државната Zhenhua Oil, го зголемија купувањето на руска сурова нафта во последните месеци откако им беа понудени големи попусти бидејќи купувачите во Европа и САД почнаа да ја избегнуваат руската енергија поради санкциите.

Според податоците на кинеската Генерална царинска управа, увозот на нафта во Кина, кој вклучува снабдување со гасоводот Источен Сибир и пратките по море, изнесуваше речиси 8,42 милиони тони минатиот месец. Тоа ја турна Саудиска Арабија на второто место со 7,82 милиони тони.

Во март, Соединетите Американски Држави и Велика Британија рекоа дека ќе ја забранат руската нафта, бидејќи Европската унија работи на прекин на зависноста од рускиот гас.

Царинските податоци објавени во понеделникот, исто така, покажуваат дека Кина минатиот месец увезла 260.000 тони иранска сурова нафта, јавува Би-Би-Си.