Русија се соочува со сериозен недостиг на работна сила што веројатно ќе биде товар за нејзината економија со години. Комбинацијата од стареење на населението и војната во Украина драматично го намалува бројот на достапни работници, предупредуваат експертите.

Претседателот Владимир Путин постојано ја нагласува стапката на невработеност во Русија, која со 2,2 проценти е меѓу најниските во светот. Сепак, овие податоци истовремено укажуваат дека пазарот на трудот повеќе нема простор за експанзија, што директно ги ограничува можностите за економски раст.

„Вработеноста го достигна својот врв, со практично нула резерви на работна сила“, рече вицепремиерот Александар Новак во интервју за весникот „Ведомости“ кон средината на мај. 

Гувернерката на Централната банка на Русија, Елвира Набиулина, во април изјави дека модерна Русија никогаш порано не се соочила со толку сериозен недостиг на рабoтници. 

Иако податоците за миграцијата по 2022 година се ограничени, се проценува дека заминувањето на луѓето од земјата ја намалило работната сила за 300.000 до 400.000 луѓе. Во исто време, армијата апсорбирала помеѓу 700.000 и 900.000 луѓе, од кои само дел би можел да се врати во цивилниот сектор по завршувањето на војната.

Исто така, бројот на привремени работници мигранти се намалил за околу еден милион во споредба со почетокот на 2022 година, што го одразува заострувањето на миграциската политика што започнало уште пред војната.

„Екстремно ниската невработеност во Русија сега се претвора во економска пречка наместо во предност. Недостатокот на работници го ограничува производството и во одбранбениот и во цивилниот сектор. Во исто време, платите растат побрзо од продуктивноста, што ја комплицира борбата на Централната банка против инфлацијата“, нагласува економистката Екатерина Власова.

Олга Сабер, директорка на компанијата за регрутирање „Гет Експерс“, потврдува дека недостигот на работна сила станал „трајна состојба“, особено во секторите ИТ, продажба, сметководство и технички занимања, пишува euronews.rs.

Иако следната деценија би можела да донесе мало олеснување со влегувањето на пазарот на генерацијата родена во текот на 2000-тите (кога државата воведе стимулации за раѓање), тоа нема да биде доволно за да се промени општиот тренд. За рускиот пазар на трудот, ова не е минлива криза, туку „нова нормалност“ што ќе ги дефинира наредните децении.

„Блумберг економикс“ проценува дека на земјата моментално ѝ се потребни дополнителни 1,5 милиони работници за да го балансира пазарот. Економските сектори веруваат дека проблемот ќе биде долготраен - Рускиот сојуз на индустријалци и претприемачи предвидува дефицит од дури 3 милиони работници до 2030 година.

Инвазијата на Украина, која сега е во петтата година, дополнително ја влоши ситуацијата. Според Центарот за стратешки и меѓународни студии (CSIS) од Вашингтон, Русија претрпе околу 1,2 милиони загуби (вклучувајќи мртви и ранети), од кои се проценува дека до 325.000 загинале до јануари оваа година.