-Антируските санкции не ја одразуваат реалноста на глобалната политика и економија.

Ова го изјави рускиот претседател Владимир Путин на денешната средба со претставници на металната индустрија.

„Веќе реков дека овие одлуки ги донесоа западните земји заради политички интереси - актуелни, опортунистички кои не ја одразуваат реалноста на глобалната политика или глобалната економија“, рече Путин, пренесува Тасс.

Тој додаде дека, без оглед на актуелните политички тешкотии, Русија секогаш ќе биде сигурен и одговорен снабдувач на метални производи за странските клиенти и партнери.

„Ќе бидеме сигурни партнери на оние кои бараат профитабилна, предвидлива деловна соработка. Но, нема да правиме бизнис на штета на себе со оние кои отворено покажуваат непријателски став“, нагласи претседателот на Руската Федерација.

Путин рече дека „и индустриските компании и владата, како и лидерите на руските региони треба да се фокусираат на обезбедување на домашната побарувачка за метални производи“.

Рускиот вицепремиер и министер за индустрија и трговија Денис Мантуров на средбата изјави дека извозот на металната индустрија во вториот квартал од 2022 година паднал за околу 20 отсто.

„Руските метални компании сега работат во услови на ограничен пристап до западните пазари. Извозот падна за околу 20 отсто во вториот квартал. Имаше и значителен пад на домашната потрошувачка. Како резултат на тоа, искористеноста на капацитетите во индустријата се намали од просечниот од 93 до 80 отсто“, прецизира тој.

Мантуров изјави и дека Турција, Кина и Мексико го зголемиле увозот на руски метални производи, додека, според него, Кина го зголемила купувањето за повеќе од пет пати во првата половина од годината, пренесува Тасс.