Вкупно 212.690 родители неделава ја искористиле можноста за успехот на своето дете на училиште да се информираат преку СМС порака, што претставува зголемување за околу 50% во однос на неделите во ноември 2013, кога за првпат беше воведена ваквата услуга, информираше министерот за образование и наука Спиро Ристовски. „Родителите и старателите го практикуваат овој начин на информирање за состојбите на нивните деца во училиште и повеќе не се чекаат само родителските средби“, рече тој. Освен ова, за секоја поважна промена во училишниот успех и поведение, најголем дел од родителите веднаш реагираат, самостојно ги интензивираат посетите и средбите со класните раководители и другите наставници и остваруваат непосреден контакт за да се информираат за се што ги интересира поврзано со нивните деца – ученици, информирале раководствата на училиштата. Во однос на јазикот, на кој се испратени пораките, 170.780 се на македонски, 40.324 на албански и 1.586 на турски јазик. Информирањето на родителите за состојбата на учениците еднаш неделно преку СМС пораки е дел од проектот „Информиран родител“, во чии рамки беше воведен електронски дневник, кој овозможува брз и едноставен увид во информациите од дневникот во пишана форма.