Ристески објасни како од 1 јануари ќе ја пресметуваат просечната потрошувачка кошничка
Нова просечна потрошувачка кошничка од 1 јануари 2026 година ќе пресметува Владата.
Заменик министерот за економија и труд, Марјан Ристески денеска при посетата на штипскиот Универзитет „Гоце Делчев“ најави дека од 1 јануари освен што синдикатите ќе ја пресметуваат минималната потрошувачка кошничка и тие како Влада ќе прават пресметка за просечна потрошувачка кошничка, која ќе биде за најмалку четиричлено семејство. На оваа тема ќе се разговара на Економско –социјалниот совет, кој е закажан за 22 декември.
„Од 1 јануари ќе се пресметува покрај синдикална минимална кошничка, ќе имаме и просечна потрошувачка кошничка на ниво на Република Македонија, која нас ќе ни користи како економија и Влада за понатамошни стратегии во економските политики и секако за зачувување на животниот стандард“, вели Ристески.
Ристески вели дека ќе ги земат предвид цените од најголемите маркети.
„Ќе бидат земени параметри од најголемите маркети во Македонија, ќе бидат земени параметри од страна на основните прехранбени производи, за се она што е потребно за еден просечен живот, за едно просечно македонско семејство. Исто така ќе бидат земени и од различни региони и најчесто овошјето и зеленчукот ќе биде земен она коешто е карактеристично за периодот, кога се пресметува во текот на годината“, вели Ристески.Понатаму планираат да пресметуваат и други кошнички како што е за двочлено, тричлено семејство, бидејќи просечната ќе биде за најмалку за четиричлено семејство, потоа за пензионери итн.
foto freepik.com
Слично
Поврзани вести
