Токио објави дека во Тихиот Океан се откриени ретки земни елементи, на рекордна длабочина на морето, што би можело да има големо значење за глобалниот пазар на стратешки минерали.

Владата во понеделник соопшти дека за време на пробна мисија во длабоко море, седимент што содржи ретки метали е изваден од длабочина од 6.000 метри (околу 20.000 стапки). Оваа иницијатива е дел од зголемените напори за започнување со експлоатација на богатите наоѓалишта на океанското дно, со цел да се намали зависноста од Кина кога станува збор за овие исклучително вредни минерали.

Портпаролот на владата, Кеи Сато, изјави дека примерокот, земен од Јапонската агенција за морска и земска наука и технологија (JAMSTEC), моментално се анализира за да се утврди количината на ретки елементи во седиментот.

Таа ја опиша екстракцијата на седиментот како „значајно достигнување, како во однос на економската безбедност, така и во контекст на сеопфатниот развој на морските ресурси“.

Министерката за наука и технологија, Јохеј Мацумото, чие министерство ја надгледува работата на JAMSTEC, во неделата објави на социјалните медиуми дека истражувачкиот брод Чикју собрал таканаречена „кал од ретки метали“.

Длабокоморен истражувачки брод минатиот месец исплови кон оддалечениот тихоокеански остров Минами Торишима, за чии води се верува дека содржат извонредно богати наоѓалишта на вредни минерали.

Се проценува дека областа околу Минами Торишима, која е во рамките на економските води на Јапонија, содржи повеќе од 16 милиони тони ретки земни елементи. Бизнис дневникот „Никеи“ наведува дека тоа е третата најголема резерва од ваков вид во светот.

Кон крајот на минатата година, Јапонија потпиша договор со Соединетите Американски Држави(САД) за координирање на снабдувањето со ретки метали, додека двете земји изразуваат загриженост за контролата на Кина врз голем дел од критичните минерални ресурси во светот.

Постои посебен страв дека Кина, како најголем снабдувач на ретки земни елементи во светот, би можела да го ограничи или суспендира извозот поради затегнати дипломатски односи, пренесува Форбс Босна.