Пазарот на недвижности во регионот продолжува да бележи силна динамика, со рекордни вредности во Србија и раст на цените во Хрватска и Црна Гора.

Во Србија, вкупната вредност на пазарот на недвижности во 2025 година достигна рекордни 8,1 милијарди евра. Најскапиот стан по квадратен метар бил продаден во Белград за 15.298 евра, додека највисоката поединечна трансакција изнесувала 1,8 милиони евра за стан во комплексот „Белград на вода“. Најскапата куќа достигнала цена од 3,8 милиони евра во општината Савски венец, каде што и гаражно место било продадено за 66.000 евра.

Во Хрватска, и покрај падот на бројот на трансакции, цените продолжуваат да растат. Во 2025 година биле продадени 20.293 станови со вкупна вредност од 3,45 милијарди евра, а просечната цена на трансакција изнесувала околу 170.000 евра. Средната цена по квадратен метар достигнала 2.587 евра, при што највисоки цени се забележани во Сплитско-далматинската жупанија (3.333 евра), Загреб (2.917 евра) и Приморско-горската жупанија (2.824 евра).

Во Црна Гора, трендот на раст продолжува и во 2026 година. Просечната цена на стан во првиот квартал достигнала 2.910 евра за квадратен метар, што е зголемување од 8,5 проценти на годишно ниво. Подгорица бележи најголем раст од 17,2 проценти, со просечна цена од 2.707 евра по квадрат и највисок принос од изнајмување од 4,9 проценти. Будва останува најатрактивна крајбрежна дестинација со цена од 3.344 евра по квадратен метар.

Значаен фактор на црногорскиот пазар се странските купувачи, кои учествуваат со речиси две третини од вкупните трансакции, што дополнително го поттикнува растот на цените и побарувачката.