Вкупно 1.934.323 биометриски лични карти се издадени досега во Македонија, информираше министерката за внатрешни работи Гордана Јанкуловска, која имаше координација со надлежните од управните служби во пресрет на претстојните претседателски и предвремени парламентарни избори. Покрај ова, издадени се вкупно 1.857.909 биометриски пасоши, а 124.962 граѓани се водат во евиденцијата како државјани, но немаат ниту еден биометриски документ. „Карактеристично за овие избори е тоа што замената на документите започна во 2007 година, а во меѓувреме дел од издадените документи ја изгубиле својата важност заради истек на рокот. Таквата бројка на документи е 12.255“, рече Јанкуловска. Во периодот до изборите, сите документи ќе се разгледуваат во брза постапка односно веднаш ќе се одобруваат и изработуваат, со цел да им се излезе во пресрет на граѓаните кои сакаат да гласаат.