Производството на вода за пиење во Македонија континуирано расте во последните години. Статистичките податоци покажуваат дека во 2013 година, производството на вода бележи раст од 6 отсто во однос на 2012 година. Вкупниот извоз минатата година бил поголем за 5 отсто, додека увозот опаднал за 27 отсто. Главен проблем, според производителите на вода, за слабиот раст на извозот е тоа што традиционално се свртени кон регионалниот пазар каде што имаат голема конкуренција и малку е направено за пробив на поголеми пазари. Според претседателот на регионалната комора од Кавадарци и извршен директор на компанијата „Кожувчанка“, Митко Јанчев, можности за увоз има пред се на пазарите на Блискиот Исток, но за тоа е потребна поголема конкурентност со иновации за намалување на трошоците во производството и помало загадување на околината. „Во нашата компанија веќе инвестиравме 1,5 милиони евра во најнова технологија за производство на амбалажа. Со тоа имаме  30 отсто помало користење на пластика и истовремено ги намаливме трошоците на производство 30 до 40 отсто, со што нашиот производ добива на конкурентност и ќе може полесно да се пласира“, објаснува Јанчев. Зголеменото производство на вода за пиење, според познавачите, се должи на развојот на малопродажните синџири и промената на животните навики на населението. Најголемот дел од произведеното е пласирано на домашниот пазар (80 отсто), а остатокот се извезува. Во Македонија егзистираат 26 компании кои произведуваат вода со околу 1.200 постојано вработени.  Дел од компаниите веќе почнаа да инвестираат во модернизирање на производството и воведување иновативна амбалажа, атрактивен дизајн, а размислуваат и за посериозни промотивни кампањи за пробив  на странските пазари.