Албанскиот премиер Еди Рама од еден од омилените балкански политичари на западните центри на моќ во обид да го зајакне домашниот политички рејтинг и да се покаже како голем албански деец се претвора во фактор за нестабилност на Балканот, како со провокациите кон Македонија, така и со последните изјави кои ја вознемирија целата балканска јавност. 

Еди Рама смета дека постои можност за идејата Албанија и Косово да имаат заеднички претседател бидејќи оваа функција според уставните уредувања е симболична во извршната власт. 

Секако, ова не е некоја бенигна изјава која може така лесно да пројде бидејќи веднаш се враќаат стравовите за нови промени на границите на Балканот, пресврт кој соседните држави меѓу кои Македонија, Србија, Грција и Црна Гора не може да го премолчат. 

Знаци на неодобрување на овој политички и манипулативен маркетинг стигнаа и од Брисел каде поблаго е искаран Рама со неговите „несоодветни“ изјави. Во исто време Македонија мака мачи да докаже дека нема никакви иредентистички претензии кон својот јужен сосед со моќна балканска армија и членка на НАТО и ЕУ.