Премиерот на Албанија, Еди Рама, за време на учеството на самитот ЕУ-Западен Балкан што се одржува во Тиват, се фокусираше и на протестите против проектот што се дискутира во Звернец.

Луксузниот туристички проект на албанскиот брег, поврзуван со Џаред Кушнер, зетот на американскиот претседател Доналд Трамп, отвори сериозни прашања за сопственоста врз земјиштето, транспарентноста на инвестициската шема и иднината на еден од најчувствителните природни предели во Албанија, по што избија и неколкудневни протести во земјата.

Во врска со протестите за Звернец, шефот на владата изјави дека не станува збор за еколошко прашање, туку за „хибридна војна“.

Според него, зад протестот стојат ирански елементи, кои, како што рече, биле вклучени во слични напади во други прилики.

„Таму нема еколошко прашање, тоа е хибридна војна. Зад протестот стојат Иранците, кои биле вклучени во напади во други прилики“, додаде тој.

Рама ги отфрли тврдењата за проектот во Звернец, наведувајќи дека тоа не е оној за кој јавно се дискутирало и дека на граѓаните им се прикажани лажни видеа произведени во Тирана.

Премиерот додаде дека во моментов нема што да се дискутира во врска со ова прашање, бидејќи, според него, нема одобрен проект.

„Проектот во Звернец не е оној за кој се дискутирало. Видовте лажни видеа од Тирана… Нема што да се дискутира, бидејќи нема одобрен проект“, рече Рама.