МЗТ Леарница му се спротистави на синдикатот кој со денови организира протести на вработените и ги обвини дека се обидуваат да ја уништат компанијата. Директорката Лидија Стојковска соопшти дека проблемот лежи во нереализирање на бизнис планот како и непочитување на многу професионални стандарди. Вистинската причина за штрајкот е сосема различна. Одборот на директори и менаџментот јасно им ставија до знаење на синдикатот и вработените дека времето на неодговорност, некомпетентност, уцени, манипулации е завршено, дека ќе дојде нов инвеститор кој ќе изврши строга селекција на сите вработени по сите основи и дека само оние што можат да ги исполнат строгите критериуми и ќе бидат во можност да ги исполнат плановите по обем, рок и квалитет, ќе можат и понатаму да работат во МЗТ Леарница АД Скопје. Значи главниот проблем е во ниското остварување на бизнис планот. - Праксата на неодговорност, уцена пред секоја испорака на стоката, неквалитет, доцнење на испораките, непочитување на наредбите, искористување на работното време од околу 50 проценти, намерното уништување и оштетување на постројките, крадење на производи, модели и резервни делови се ближеше пред својот крај. Ова исто така се однесува и на високите плати ( до 45.000,00 денари во производство), несоодветни за тој вид на работа и образование. Ваквата состојба досега се толерираше поради две причини: а) недостатокот на соодветен кадар и тешкотии за обезбедување на истиот (а и тој што ќе се обезбедеше беше приморан да замине под притисок од вработените) б) поради обврските кон купувачите и настанатите штети заради неиспорака на производите, која во најголем дел беше авансно платена. Со оглед дека МЗТ Леарница АД Скопје беше во преговори со сериозни стратешки партнери и се планираше транзицијата да се спроведе во летните месеци, како и да се поправи оштетената опрема, синдикатот на потполно незаконски начин, без одлука превзеде чекори кои не водат до никакво решение на нивните барања туку уништување на фирмата и шансите за нејзиното преструктурирање, соопштуваат од МЗТ Леарница. Ракводството најави и преземање на правни мерки против лицата кои ја довеле компанијата во тешка состојба. Вработените на протестите искажаа дека не им се префрлени дури 12 плати и бараат од државните институции да реагираат и да им помогнат во нивната борба за егзистенција.