Профитот на авиокомпаниите ќе биде значително помал од очекуваниот оваа година, бидејќи конфликтот на Блискиот Исток ги зголеми трошоците за гориво и ги наруши клучните воздушни коридори, предупреди меѓународната асоцијација IATA.

IATA сега очекува вкупната нето добивка на авиокомпаниите да изнесува 23 милијарди долари во 2026 година, според годишниот извештај презентиран на нејзиното собрание во Рио де Жанеиро.

Меѓународната асоцијација за воздушен транспорт (IATA) претходно очекуваше таа да изнесува 41 милијарда долари. Минатата година, превозниците ја затворија со вкупна нето добивка од 45 милијарди долари.

Се очекува вкупните приходи на секторот да пораснат за 9,4 проценти на околу 1,16 трилиони долари, благодарение на стабилната побарувачка за патувања, повисоките цени на билетите и растот на приходите од помошни услуги, покажа извештајот во неделата. Прекин на сообраќајот над Персискиот Залив

Проценката за профитот за оваа година е намалена првенствено поради зголемувањето на цената на млазното гориво и прекините во воздушниот сообраќај во Персискиот Залив, објаснува извршниот директор на IATA, Вили Волш.

Најтешките последици би можеле да ги почувствуваат помалите превозници, а некои од нив ќе бидат принудени да се затворат оваа и следната година, очекува Волш, или ќе станат мета за преземање од поголемите конкуренти.

Како прв пример, шефот на IATA го наведе американскиот нискобуџетен превозник Spirit Airlines, кој престана со работа минатиот месец.

Намалување на воздушните рути

За да ја одржат профитабилноста, авиокомпаниите би можеле да го намалат бројот на рути што не носат задоволителни резултати. Според Волш, силната побарувачка за патувања и ограничениот капацитет создаваат услови во кои цените на билетите ќе останат високи во наредниот период.

Цените нагло се зголемија од почетокот на американско-израелската војна против Иран и нема да паднат наскоро, верува IATA.

Повеќето региони во светот ќе продолжат да работат со профит, проценуваат тие, иако помали од порано. Сепак, превозниците на Блискиот Исток би можеле да доживеат загуби поради војната и послабата побарувачка. Најголемиот товар за индустријата се трошоците за гориво, за кои се очекува да достигнат околу 350 милијарди долари оваа година, околу 39 проценти повисоки отколку во 2025 година, што претставува речиси една третина од вкупните оперативни трошоци на авиокомпаниите.

Повисоките трошоци значат помал приход по патник, кој се очекува да биде околу 4,50 долари, околу половина од износот во 2025 година.

Доцнењата во испораките на нови авиони „Ербас“ и „Боинг“ исто така предизвикуваат главоболки за превозниците, бидејќи тие се принудени да користат постари, помалку ефикасни авиони подолго време, што подразбира повисоки трошоци за одржување и ги попречува мерките за подобрување на профитабилноста.