Денеска од Професорскиот пленум до Иницијативниот одбор за ослободување на новинарот Томислав Кежаровски, Здружението на новинари на Македонија и Самостојниот синдикат на новинари и медиумски работници на Македонија беше испратено барање за ослободување на новинарот Томислав Кежаровски. Според нив заробувањето на новинарот Кежаровски значи заробување на вистината, слободата на говорот, а со тоа и слободата на право на различно мислење. „Водењето на судската постапка и итното приведување на Кежаровски е јасна порака за неговите колеги новинари, но и за секој од нас кој се осмелува гласно да проговори. Не сакаме да бидеме неми сведоци на кршењето на демократските слободи, диригирано судство и беспредметни казни, во држава каде од новинарите се бара да се претворат во илузионисти“, потенцираат од Професорскиот пленум. Тие во име на човечките вредности, во име на вистината и правдата, повикуваат новинарот Томислав Кежаровски да биде пуштен на слобода!